CONVOCA
Servicio Galego de Promoción da Igualdade do Home e da Muller, como organismo autónomo adscrito á Consellería de Familia, Promoción do Emprego, Muller e Xuventude,
Resolución do 14 de febreiro de 2001 pola que se crean os Premios Galicia en Feminino e se aproban as bases para a súa concesión. D.O.G. Nº 38 - Xoves, 22 de febreiro de 2001.
O Servicio Galego de Promoción da Igualdade do Home e da Muller, como organismo autónomo adscrito á Consellería de Familia, Promoción do Emprego, Muller e Xuventude, créase por Lei 3/1991, do 14 de xaneiro, tendo como obxectivo principal a promoción e adopción de medidas encamiñadas á consecución da igualdade efectiva das mulleres e dos homes, removendo os obstáculos que impidan a participación e a integración da muller na vida social, cultural, educativa, económica e política de Galicia.
O artigo 3 do citado texto legal determina as funcións que desenvolve dito Servicio para o cumprimento de tales obxectivos e, entre elas, a de realizar e fomentar estudios sobre a situación das mulleres galegas, promover medidas e programas de igualdade de oportunidades entre homes e mulleres, incentiva-la participación das mulleres na vida política, económica, cultural, educativa e laboral, así como velar polo cumprimento dos convenios e tratados internacionais nos aspectos que afecten a materias de igualdade.
Neste sentido, as directrices da Unión Europea instan ós Estados membros a considera-la igualdade de oportunidades entre mulleres e homes como un principio democrático básico respaldado polos tratados internacionais. A incorporación da igualdade de oportunidades en tódolas políticas deixou de considerarse unha opción para converterse nunha esixencia na construcción da Europa da cidadanía. O principio de igualdade implica por unha parte a realización de medidas específicas de igualdade de oportunidades e por outra a consideración activa e explícita dos posibles efectos diferenciais que terán en homes e mulleres os programas e actuacións políticas a desenvolver por entidades e organismos.
Os Estados membros a instancias da Unión Europea poñerán en marcha actuacións que promovan un reparto equilibrado das responsabilidades na vida política, económica, social, cultural, profesional e familiar
TEMA
Co fin de estimular e dinfundi-las actuacións que reflicten as aportacións das mulleres á sociedade, denuncien as situacións de discriminación por razón de sexo e promovan a transformación de esteriotipos sexistas, así como recoñece-la traxectoria e o esforzo de persoas e entidades a favor da igualdade de oportunidades.
CATEGORIAS
As modalidades convocadas son as seguintes:
a. Premio á participación laboral das mulleres.
b. Premio á difusión de imaxe non discriminatoria das mulleres.
c. Premio á participación artístico-cultural das mulleres.
d. Premio á participación social das mulleres.
e. Distinción honorífica pola defensa da igualdade.
PREMIOS
Os premios "Galicia en Feminino" outorgaranse con carácter exclusivamente honorífico e non xenerarán dereito a ningún devengo nin efecto económico
DESCRIPCION Premio á participación laboral das mulleres.
1. Outorgarase a proxectos empresariais ou empresas promovidas por mulleres ou aquelas que melloren a situación das mulleres nos postos de traballo, implantadas en Galicia.
2. O xurado valorará as realizacións encamiñadas a posibilita-la inserción laboral por conta propia ou allea, a impulsa-la conciliación da vida profesional e familiar, a promove-la diversificación profesional e a favorece-lo acceso ós postos de decisión.
Premio á difusión dunha imaxe non discriminatoria das mulleres.
1. Poderán optar profesionais do xornalismo que desenvolvan a súa labor na Comunidade Autónoma de Galicia, e programas continuados e puntuais de medios de comunicación e campañas publicitarias.
2. O xurado valorará a contribución á modificación de estereotipos tradicionais no tratamento da imaxe das mulleres nos distintos ámbitos, o uso dunha linguaxe non sexista, a divulgación dos logros e contribucións das mulleres e a labor expresa na defensa da igualdade de oportunidades entre mulleres e homes.
Premio á participación artístico-cultural das mulleres.
1. Outorgarase a persoas individuais destacadas en actividades artístico-culturais ou a entidades e programas que promovan o protagonismo cultural das mulleres galegas.
2. O xurado valorará a labor realizada para resalta-las aportacións das mulleres á arte e á cultura, dignificando os logros obtidos e visibilizando a importancia das actividades realizadas tradicionalmente por mulleres no ámbito cultural de Galicia.
Premio á participación social.
1. Poderán recibi-lo premio entidades que promovan a incorporación activa das mulleres a tódolos ámbitos de desenvolvemento social de Galicia.
2. O xurado valorará o traballo realizado para fomenta-la participación social das mulleres nun plano de igualdade atendendo especificamente á participación promovida naqueles ámbitos en que existen dificultades engadidas por tratarse dos colectivos máis desfavorecidos pola sociedade.
Distinción honorífica pola defensa da igualdade.
1. Outorgarase a persoas ou entidades que de xeito continuado e relevante contribuíran á igualdade de oportunidades das mulleres galegas.
2. O xurado estudiará as propostas que estén avaladas por organismos públicos, asociacións de mulleres ou entidades de iniciativa social que se presentarán acompañadas dun resumo de motivacións e méritos que consideren que concorren na persoa ou entidade que propoñen.
Santiago de Compostela, 14 de febreiro de 2001
Aurora Montes Santa-Olalla
Directora xeral do Servicio Galego de Promoción da Igualdade do Home e da Muller
Candidaturas.
1. Cada membro do xurado propoñerá candidaturas por cada modalidade de premio, acompañando unha memoria explicativa dos valores e méritos de cada unha delas, que permita ós membros do xurado valorar cada proposta.
2. O xurado elexirá ós/ás premiados/as, en cada modalidade, entre as candidaturas propostas polos seus membros, durante as súas sesións de traballo.
Os premios concederanse anualmente, referíndose ós méritos das candidaturas durante o ano anterior ó da súa concesión.
Entrega dos Premios
Os Premios entregaranse no transcurso dun acto público, no mes de marzo de cada ano, con motivo da celebración do Día Internacional das Mulleres.
